‘प्रदेशमा स्वास्थ्य क्षेत्र सुधारका लागि सरकार प्रतिबद्ध भएर लागिरहेको छ’

लमजुङ, ३ कात्तिकः गण्डकी प्रदेशका स्वाथ्यमन्त्री कृष्णप्रसाद पाठकले प्रदेशमा स्वास्थ्य क्षेत्र सुधारका लागि सरकार प्रतिबद्ध भएर लागिरहेको बताउनुभएको छ ।

बेंसीसहर नगरपालिका–८ स्थित जिल्ला अस्पताल लमजुङको दोस्रो वार्षिकोत्सव कार्यक्रममा उहाँले प्रदेशमा स्वास्थ्य क्षेत्रमा आमूल परिवर्तन गर्नेगरी सरकारले नीति, कानुन र संरचना सुधारमा जोड दिएको बताउनुभयो । मन्त्री पाठकले भन्नुभयो,“हामीले स्वास्थ्य क्षेत्रको अवस्था सुदृढ गर्न गण्डकी प्रदेश स्वास्थ्य सुधार कार्यक्रम अगाडि सारेका छौँ । त्यसका लागि कार्ययोजना बनाएर एक सय काम पूरा गर्ने लक्ष्य राखेर क्रियाशील भइरहेको छु ।”

यद्दपि सङ्घीय सरकारले अझै प्रदेश सरकारलाई अधिकार नदिँदा काम गर्न समस्या रहेको उहाँको भनाइ थियो । मन्त्री पाठकले लमजुङ अस्पतालमा आधुनिक भवन निर्माणका लागि केही दिनमा बोलपत्र आहृवान गर्ने तयारी रहेको जानकारी दिनुभयो । प्रदेशभित्रका अस्पतालमा कतै उपकरण, कतै दक्ष जनशक्ति, स्वास्थ्य पूर्वाधारको अभाव रहेकाले यसको व्यवस्थापनका लागि आफू लागिरहेको उहाँले सुनाउनुभयो ।

कार्यक्रममा पूर्वस्वास्थ्यमन्त्री मधु अधिकारी गुरुङ, गण्डकी प्रदेशसभा सदस्य भेषबहादुर पौडेल, जिल्ला समन्वय समिति लमजुङका प्रमुख पूर्णबहादुर गुरुङ, बँेसीसहर नगरपालिका प्रमुख गुमानसिंह अर्याल, विभिन्न पार्टीका अध्यक्ष तथा प्रतिनिधिहरूले लमजुङ अस्पतालको विकासका लागि सबै एकजुट हुँदै अघि बढ्नुपर्ने धारणा राखेका थिए ।