एचपिभी खोप अभियान तयारी अन्तिम चरणमा, १६ लाख ८८ हजार ७६८ किशोरीलाई लगाईदैँ

काठमाडौंः स्वास्थ्य तथा जनसंख्या मन्त्रालयले पाठेघरको मूखको क्यान्सर विरुद्ध दिईन लागेको ह्यूमन प्यापिलोमा भाइरस (एचपिभी) खोप अभियानको तयारी अन्तीम चरणमा पुगेको जनाएको छ ।

स्वास्थ्य मन्त्रालय, स्वास्थ्य सेवा विभाग अन्तर्गत राष्ट्रिय स्वास्थ्य शिक्षा सूचना केन्द्रले आगामी माघ २२ गतेदेखि फागुन ६ गतेसम्म सञ्चालन हुने एचपिभि खोप अभियानको संघ, प्रदेश र स्थानिय तहमा तयारी अन्तिम चरणमा पुगेको जनाएको हो । विज्ञहरुका अनुसार एचपिभी भाइरसबाट पटक पटक संक्रमण भएर २० वर्षसम्म यो संक्रमण रह्यो भने पाठेघरको मुखको क्यान्सर हुन सक्छ ।

अभियानमा कक्षा ६ देखि १० सम्मका किशोरी र विद्यालय नजाने १० देखि १४ वर्ष उमेर समूहका किशोरी समेटिनेछन् ।

परिवार कल्याण महाशाखाका खोप शाखा प्रमुख डा.अभियान गौतमका अनुसार १६ लाख ८८ हजार ७६८ किशोरीलाई एचपिभी खोप लगाइनेछ ।

कोशि प्रदेशमा २ लाख ५९ हजार ८८१, मधेश प्रदेशमा चार लाख ७ हजार ८८१, बागमती प्रदेशमा २ लाख ७३ हजार १२१, गण्डकी प्रदेशमा १ लाख १८ हजार ७७४ किशोरीलाई खोप लगाईने छ । यस्तै, लुम्वीनी प्रदेशमा २ लाख ९९ हजार चार सय ७१, कर्णाली प्रदेशमा एक लाख २८ हजार २९६ र सुदुरपश्चिम प्रदेशमा २ लाख एक हजार ९३४ किशोरीलाई खोप लगाइने खोप महाशाखाले जनाएको छ ।

नेपालमा हरेक वर्ष २ हजार एक सय ६९ जना महिलालाई पाठेघरको मुखको क्यान्सर हुने अनुमान गरिएको छ । खोप शाखा प्रमुख डा. गौतमले हरेक वर्ष एक हजार तीन सय १३ जना महिलाहरुको पाठेघरको मुखको क्यान्सरबाट मृत्यु हुने गरेको र औसतमा प्रत्येक दिन चार जना महिलाहरुको पाठेघरको मुखको क्यान्सरबाट मृत्यु हुने गरेको बताए ।

परिवार कल्याण महाशाखाका प्रमुख डा.वीवेक लालले एचपिभी खोप सुरक्षित र प्रभावकारी रहेको बताए । डा.लालले भने, ‘यो खोप सुरक्षित र प्रभावकारी छ । विश्व स्वास्थ्य संगठनले गुणस्तरयुक्त भनि प्रमाणीत खोप मात्र नेपालमा खरिद गरिन्छ । यो खोप नेपालमा प्रदान गर्नका लागि औषधि व्यवस्था विभागबाट अनुमति लिइसकेका छौं ।’ अभियानका क्रममा प्रत्येक विद्यालयलाई खोप केन्द्रका रुपमा परिणत गरिनेछ ।

आज मंगलबार स्वास्थ्य शिक्षा सूचना केन्द्रले अभियानलाई सार्थक बनाउने बारे शिक्षा पत्रकार सञ्जाल(इजोन)संग छलफल गरेको थियो । संजालका उपाध्यक्ष मञ्जीमा ढकालले अभियानलाई सार्थक बनाउन सञ्चारकर्मीको भूमिका बारे प्रस्तुती प्रस्तुत गरेकी थिईन् । इजोनका अध्यक्ष ईश्वरराज ढकालले विद्यालय तहमा एचपिभी खोप अभियान प्रभावकारी बनाउन सके अभियानले सार्थकता पाउने बताए ।
एच.पि.भी खोप सिकोलिन कसरी दिइन्छ ?
खोप शाखाका प्रमुख डा.अभियान गौतमका अनुसार यो खोपको एक मात्रा ०.५ मिलिलिटर हो । यो खोप सुईको माध्यमबाट बाँया पाखुराको माथिल्लो बिच बाहिरी भागमा मासुभित्र दिनुपर्छ । पछिल्लो अध्ययन अनुसार यो खोप एक मात्रा लगाएपछि पूर्ण मात्रा हुन्छ । राष्ट्रिय खोप सल्लाहकार समितिको सिफारीसले यो खोप एक मात्रा लगाउने खोप तालिका निश्चित गरिएको छ ।